Tungutækni er þýðing á language technology (eða language engineering, sem einnig hafði verið þýtt sem tungumálaverkfræði). Orðið vísar til samvinnu tungumáls og tölvutækni í hagnýtum tilgangi, samvinnu sem beinist að því að hanna eða útbúa einhvern hugbúnað eða tæki sem nýtist mönnum í starfi eða leik. Þessi samvinna getur bæði falist í notkun tölvutækninnar í þágu tungumálsins og í notkun tungumálsins innan tölvutækninnar.

Undir merkjum tungutækni eru stundaðar margvíslegar rannsóknir í málfræði, tölvufræðilegum málvísindum og tölvunarfræði, með það að markmiði að gagnast í ákveðnum iðnaði. En tungutækni er líka oft hrein iðnaðarstarfsemi, sem nýtir sér fyrirliggjandi gagnasöfn og rannsóknaniðurstöður tölvufræðilegra málvísinda og gagnamálfræði við smíði hvers kyns forrita og tóla. Sem dæmi um afurðir tungutækni má nefna talgervla sem lesa upp ritaðan texta, ýmiss konar leiðréttingarforrit sem lagfæra stafsetningu, beygingar og orðanotkun.

Það er hægt að nýta tölvu- og upplýsingatækni á ýmsan hátt til þess að auðvelda mönnum að nota tungumálið. Þar má nefna ýmiss konar hugbúnað til að leiðrétta og leiðbeina um stafsetningu og málfar. Slíkur búnaður fylgir t.d. algengum forritapökkum eins og Microsoft Office á ýmsum tungumálum. Íslensk stafsetningarleiðréttingarforrit eru til, einkum Púki Friðriks Skúlasonar, en ekkert málfræðileiðréttingarforrit er til fyrir íslensku. Vélrænar þýðingar af einu máli á annað falla undir þetta.

Þá má nefna ýmiss konar tölvuorðabækur. Nokkrar slíkar hafa verið til milli íslensku og erlendra mála, en engin sérlega fullkomin. Nú er Íslensk orðabók þó komin á rafrænu formi. Hér má einnig telja ýmiss konar hjálpartæki handa þeim sem eiga erfitt með mál eða lestur sökum einhvers konar fötlunar. Til er íslenskur talgervill, þ.e. hugbúnaður sem gerir tölvu kleift að lesa upp ritaðan (tölvutækan) texta. Slíkur búnaður  var upphaflega gerður um 1990 og var síðar endurbættur út frá annarri tækni en upphaflega var notuð. Þessi talgervill hefur nýst blindum og sjónskertum vel, en nú hefur  verið gerður nýr talgervill sem tekur þeim eldri langt fram. Einnig hefur verið þjálfaður íslenskur talgreinir.  Að endingu má nefna hér ýmiss konar kennsluforrit til að þjálfa notkun tungumálsins.

En tungumálið er ekki bara þiggjandi í þessari samvinnu við tölvutæknina. Það er líka notað á margvíslegan hátt til að gera tæknina aðgengilegri og auðvelda mönnum að nýta sér hana. Þar má í fyrsta lagi nefna notkun tungumálsins við leit á netinu og í ýmiss konar gagnabönkum. Í stað þess að bera spurningar fram á staðlaðan hátt, og nota takmarkaðan orðaforða, er nú víða hægt að spyrja á venjulegu máli, rétt eins og maður talar við mann. Þetta er að verða algengt víða erlendis þar sem svara þarf mörgum svipuðum fyrirspurnum á ákveðnu sviði, t.d. í sambandi við flug- og lestarsamgöngur. Þar eru nýtt svonefnd samræðukerfi (e. dialogue systems) þar sem maður og tölva ræða saman á mannamáli, ýmist rituðu eða töluðu. Með tilkomu íslensks talgreinis og talgervils hafa opnast möguleikar á slíkum kerfum hér á landi.

Einnig má nefna notkun málsins við stjórn tölva og ýmiss konar tölvustýrðra tækja. Það fer mjög í vöxt að slíkum tækjum sé stjórnað með venjulegu máli, annaðhvort rituðu eða töluðu. Skipanir eru þá ýmist slegnar inn á lyklaborð eða talaðar í hljóðnema, í stað þess að ýtt sé á þartilgerða takka. Þetta mun á næstunni taka til sífellt fjölbreyttari tækja, s.s. ýmiss konar framleiðslutækja, heimilistækja og bíla.

Meiri fróðleik um tungutækni er að finna í ýmsum greinum um tungutækni hér á vefnum, svo og skýrslu starfshóps um tungutækni. Einnig má vísa í upplýsingasetrin sem nefnd eru undir KRÆKJUR, einkum LT World