Tungutæknisetur (Icelandic Center for Language Technology, ICLT)  var stofnað 15. júní 2005 með undirritun samstarfssamnings Málvísindastofnunar Háskóla Íslands, tækni- og verkfræðideildar Háskólans í Reykjavík og Orðabókar Háskólans (nú orðfræðisviðs Stofnunar Árna Magnússonar í íslenskum fræðum). Setrinu er ætlað að vera vettvangur fyrir samstarf þessara aðila um rannsóknir, þróun og kennslu í tungutækni. Aðrar háskólastofnanir og fyrirtæki sem stunda rannsóknir, þróun eða kennslu í tungutækni geta óskað eftir aðild að setrinu.

Hlutverk setursins er að vera miðstöð íslenskrar tungutækni, og því hlutverki gegnir það m.a. með því að:

• vera upplýsingaveita um íslenska tungutækni og reka vefsetur í því skyni
• stuðla að samstarfi háskóla, stofnana og fyrirtækja um tungutækniverkefni
• skipuleggja og samhæfa háskólakennslu á sviði tungutækni
• taka þátt í norrænu, evrópsku og alþjóðlegu samstarfi á sviði tungutækni
• eiga frumkvæði að og taka þátt í rannsóknaverkefnum á sviði tungutækni
• eiga frumkvæði að og taka þátt í hagnýtum verkefnum á sviði tungutækni
• halda utan um ýmiss konar hráefni og afurðir á sviði tungutækni
• halda árlega ráðstefnu með þátttöku fræðimanna, fyrirtækja og almennings
• beita sér fyrir eflingu íslenskrar tungutækni á öllum sviðum

Setrinu er einkum ætlað að vera vettvangur fyrir samstarf einstaklinga sem starfa á sviði tungutækni hjá samstarfsaðilunum, og jafnframt bakland þeirra vegna þátttöku í ýmiss konar innlendu og erlendu samstarfi.

Yfir setrinu er stjórn sem skipuð er einum fulltrúa frá hverjum samstarfsaðila. Stjórnin þarf að samþykkja þau verkefni sem í er ráðist í nafni setursins. Einstakir samstarfsaðilar hafa áfram fullt frelsi til að standa að og taka þátt í verkefnum án samþykkis stjórnar, en þau verkefni eru þá í þeirra nafni.

Stjórnin getur tilnefnt forstöðumann úr hópi kennara og fræðimanna í tungutækni hjá samstarfsaðilunum. Hlutverk forstöðumanns er að halda utan um sameiginlega þætti í rekstri setursins og beita sér fyrir samstarfi og samhæfingu verkefna.

Samstarfsaðilarnir sjá setrinu fyrir húsnæði og aðstöðu samkvæmt nánara samkomulagi. Meginreglan er sú að hver aðili sér um sig í því efni og ekki er stefnt að einni sameiginlegri miðstöð fyrir alla aðila setursins.

Stjórn setursins skipa:

• Eiríkur Rögnvaldsson frá Málvísindastofnun Háskóla Íslands - formaður
• Hrafn Loftsson frá tækni- og verkfræðideild Háskólans í Reykjavík
• Sigrún Helgadóttir frá orðfræðisviði Stofnunar Árna Magnússonar í íslenskum fræðum

Tungutæknisetur á aðild að CLARIN og ELRA og er styrktarfélagi í NEALT.

Á næstu síðu er gerð grein fyrir starfsemi Tungutækniseturs.