13.11. 2001

Íslenskt þekkingarsetur í tungutækni

Stjórn norrænu tungutækniáætlunarinnar (Nordisk sprogteknologisk forskningsprogram) hefur úthlutað styrkjum til að koma upp þekkingarsetrum (dokumentationscenter) í tungutækni í norrænu ríkjunum fimm; Íslandi, Danmörku, Noregi, Svíþjóð og Finnlandi. Styrkur til hvers lands er að upphæð 110 þúsund norskar krónur á ári (u.þ.b. 1,2 milljónir íslenskra króna). Styrkirnir eru veittir til eins árs í senn, en gert er ráð fyrir að sama upphæð verði veitt í fjögur ár alls að því tilskildu að starf setranna skili viðunandi árangri.

Verkefni þekkingarsetranna er einkum að safna saman og miðla upplýsingum um hvaðeina sem viðkemur tungutækni í hverju landi fyrir sig. Þannig geta þeir sem eru að vinna á sviði tungutækni sótt þangað upplýsingar um hvaða efni sé til og hvar það sé að finna. Einnig er gert ráð fyrir því að setrin þjóni að einhverju leyti sem gagnabankar, þannig að menn geti ekki einungis sótt þangað upplýsingar um gögn, heldur í sumum tilvikum gögnin sjálf. Það er þó ljóst að staða tungutækni á Norðurlöndum er mjög mismunandi, og því verða verkefni setranna ekki alveg þau sömu í byrjun.

Íslenska þekkingarsetrið verður rekið á vegum Orðabókar Háskólans, í húsnæði hennar að Neshaga 16. Forsvarsmaður þess er Eiríkur Rögnvaldsson, prófessor, en Aðalsteinn Eyþórsson B.A. starfsmaður Orðabókarinnar, mun sjá um daglegan rekstur. Starfsemi setursins hófst í byrjun október. Starfsemin mun að sjálfsögðu mótast smátt og smátt, en gert er ráð fyrir að verkefni setursins fyrsta árið verða einkum þessi:

1. Að safna saman upplýsingum um forrit, textasöfn, rannsóknarniðurstöður, rannsóknarverkefni, iðnþróunarverkefni o.s.frv. innan íslenskrar tungutækni, og einnig upplýsingum um stofnanir og fyrirtæki sem vinna að þess háttar verkum.
2. Að gera þessar upplýsingar aðgengilegar í gagnagrunni sem hægt er að leita í á netinu, ásamt því að svara spurningum og veita upplýsingar í síma og tölvupósti.
3. Að kynna og vekja áhuga fólks á íslenskri tungutækni með því að setja efni á netið, skrifa greinar í blöð og tímarit, taka þátt í ráðstefnum og málstofum innanlands og erlendis, o.s.frv.
4. Að koma á tengslum við önnur norræn þekkingarsetur og kynna norræna tungutækni á Íslandi.

Stjórn norrænu tungutækniáætlunarinnar hefur einnig veitt 300 þúsund norskar krónur á ári í fjögur ár til að koma á fót samstarfsneti norrænu þekkingarsetranna (NorDokNet). Íslenska setrið tekur að sjálfsögðu þátt í því samstarfi. Fyrsti fundur netsins var haldinn í Kaupmannahöfn í byrjun október. Þar var rætt ítarlega um viðfangsefni setranna og settir á stofn vinnuhópar til að fjalla um einstök verkefni á næstu mánuðum.