Málþing um tungutækni og tungumálarannsóknir

Nú stendur yfir málþing um tungutækni og notkun tölva við tungumálarannsóknir, þýðingar og tungumálakennslu á vegum Stofnunar Vigdísar Finnbogadóttur í erlendum tungumálum við Háskóla Íslands. Á málþinginu er m.a. fjallað um þýðingaminni, notkun gagnagrunna (talað og ritað mál) í tungumálarannsóknum og tungumálakennslu og um nýbreytni í tungumálakennslu með notkun nýrra miðla.

Erlendir sérfræðingar flytja erindi á málþinginu, m.a. Jens Allwood, prófessor við Gautaborgarháskóla, Kris Van de Poel, prófessor og forstöðumaður fyrir Centrum voor Taal en Spraak í Antwerpen og Anju Saxena, dósent við Uppsalaháskóla. Stofnun Vigdísar Finnbogadóttur í erlendum tungumálum fékk styrk frá NorFa til að halda þingið. Málþingið fer fram 12.-14. september í Háskóla Íslands og er fullbókað.