Menntamálaráðuneytið lýsir eftir áhugasömum um þróun talmálsgrunna

Menntamálaráðuneytið lýsir eftir þeim sem áhuga hafa á að þróa talmálsgrunna með það fyrir augum að nýta þá í tungutæknilausnir. Þetta kemur fram í auglýsingu í Morgunblaðinu 19. janúar.

Við úthlutun styrkja til tungutækniverkefna í apríl á síðasta ári var ákveðið að verja fé til þróunar talmálsgrunna sem byggja til dæmis á orðgreiningu og talgervlum og er nú verið að auglýsa eftir áhugasömum um að vinna það verk. Þetta verkefni flokkast sem stuðningur við þróun tungutæknieininga en þróun þeirra er ráðuneytið tilbúið að kosta að nokkru eða öllu leyti.

Skilyrði fyrir framlagi ráðuneytisins er að allar heimildir til að breyta, fjölfalda og framselja afurðina yfirfærist til ráðuneytisins. Styrkþega er heimilt að vinna áfram með afurðina, breyta henni, bæta við hana og nýta hana í önnur verkefni.

Umsóknir skulu berast: Verkefnisstjórn um tungutækni, Menntamálaráðuneyti, Sölvhólsgötu 4, 150 Reykjavík, í síðasta lagi fyrir 10. febrúar 2003. Nánari upplýsingar er að fá í menntamálaráðuneytinu í síma 545 9500.