Vefsetrið www.tungutaekni.is hefur nú verið endurnýjað frá grunni.  Það hefur frá upphafi, sumarið 2001, verið rekið á vegum verkefnisstjórnar í tungutækni, en skipunartíma hennar lýkur nú um áramót. Því hefur orðið að ráði að sameina setrið þekkingarsetri um tungutækni sem Orðabók Háskólans setti upp á vegum norrænu tungutækniáætlunarinnar. Orðabókin mun því sjá um reksturinn framvegis, en norræna tungutækniáætlunin greiðir kostnaðinn fyrst um sinn.

Í tengslum við þessar breytingar hefur skipulag setursins verið lagað að núverandi framsetningu norrænna systursetra sem starfa saman í NorDokNet. Allar upplýsingar hafa verið flokkaðar og þeim gefin sérstök lykilorð í samræmi við viðurkennda lykilorðaskrá sem notuð er á upplýsingasetrinu Language Technology World. Setrið hefur nú verið tengt sérstakri leitarvél, SiteSeeker, sem leitar á öllum norrænu setrunum í einu. Flokkun upplýsinga og notkun lykilorða gefur kost á mjög markvissri leit að hvers kyns upplýsingum um tungutækni á Norðurlöndum. Í framhaldi af heimsókn norræns tungutæknifólks til Eystrasaltslandanna fyrr í haust eru einnig uppi áform um að tengja upplýsingar um tungutækni þeirra landa inn á leitarvélina.