Næsti fyrirlestur Tungutækniseturs verður haldinn í stofu 103 í Lögbergi þriðjudaginn 6. mars og hefst kl. 12:00. Fyrirlesari er Anna Björk Nikulásdóttir og nefnist erindi hennar Sjálfvirk greining merkingarvensla úr Íslenskri orðabók.

Tenging flettna/uppflettiorða við merkingarlega skyld orð gæti bætt til muna uppsetningu  og leitarmöguleika Íslenskrar orðabókar á rafrænu formi. Mögulegt væri t.d. að benda notanda á yfirheiti, samheiti eða önnur tengd orð flettunnar sem hann hefur slegið inn. Skýringartextar orðabóka fylgja yfirleitt ákveðnu formi og hægt er að ganga út frá því að þeir innihaldi merkingarlegar upplýsingar um tilheyrandi flettu. Í rannsókninni sem fjallað verður um voru skýringartextar nafnorðaflettna í Íslenskri orðabók markaðir með málfræðimarkara og því næst orðflokkamynstur skýringartextanna könnuð. Með hjálp þessara gagna tókst að þróa reglur sem gera tölvuforriti kleift að finna það eða þau orð í hverjum skýringartexta sem mynda merkingarvensl með viðkomandi flettu.

Anna B. Nikulásdóttir lauk stúdentsprófi frá Fjölbrautaskóla Vesturlands árið 1993 og blásarakennaraprófi frá Tónlistarskólanum í Reykjavík árið 1996. Á árunum 1997–2000 stundaði hún nám í tónvísindum, þýsku og málvísindum við háskólann í Mainz í Þýskalandi, og frá 2000 hefur hún verið við nám í tungutækni (computational linguistics), þýsku og kennslufræði þýsku fyrir útlendinga við háskólann í Heidelberg. Í sumar lýkur hún M.A.-prófi í tungutækni og kennslufræði þýsku fyrir útlendinga. Auk þess að starfa sem tónlistarkennari starfaði hún á námsárunum við European Media Laboratory í Heidelberg og við Fraunhofer’s Integrated Publication and Information Systems Institute (IPSI) í Darmstadt í Þýskalandi.