Næsti fyrirlestur Tungutækniseturs verður haldinn í stofu 201 í Háskólanum í Reykjavík við Ofanleiti þriðjudaginn 17. apríl og hefst kl. 12:00. Fyrirlesari er Kristinn R. Þórisson dósent og nefnist erindi hans Achieving Dynamic Turntaking in Multimodal Humanoids (Kvik lotuskipti hjá fjölhátta manngervingum). Fyrirlesturinn verður fluttur á ensku.

Gagnvirkni milli fólks í samskiptum augliti til auglitis myndar flókið mynstur hreyfinga og merkingar. Vegna þess hversu margbrotin þessi gagnvirkni er verður heildarkenning um hana að vera í formi keyrsluhæfs tölvulíkans. Í þessum fyrirlestri verður lýst tölvunarfræðilegri aðferð við að gera líkan að fjölhátta lotuskiptum í rauntíma. Hina fastbundnu en þó sveigjanlegu samskipun milli fólks sem tekur þátt í samskiptum augliti til auglitis skýrir líkanið sem útkomu úr víxlverkunum milli margra markvísra hugrænna ferla. Samkvæmt þessari nálgun eru þau mynstur sem fram koma við lotuskipti í gerjun og stafa af víxlverkun ferla hjá einstökum þátttakendum og milli þeirra. Nálgunin byggist á og útfærir fyrri vinnu með YTTM – tölvulíkan af fjölhátta lotuskiptum þar sem tekist er á við mikinn fjölda samræðueinkenna, þ. á m. endurgjöf, framígrip og nærhendisdreifingu tals.

Dr. Kristinn R. Þórisson er dósent við tölvunarfræðideild Háskólans í Reykjavík og annar stjórnenda Gervigreindarseturs (Center for Analysis and Design of Intelligent Agents). Hann hefur fengist við rannsóknir á sviði gervigreindar í rúm 17 ár, bæði í háskólaumhverfi og hjá fyrirtækjum. Í M.I.T. var hann brautryðjandi í gerð sýndarvitvera sem gæddar voru fjölhátta skynjun og aðgerðastjórn. Hjá LEGO Digital stjórnaði hann smíði stórs sýndarheims sem byggður var gagnvirkum verum. Kristinn hefur verið ráðgjafi á sviði tækni og viðskipta fyrir British Telecom, Kaupthing Investment Bank og NASA, meðal annarra, og kennt námskeið um gervigreind hjá Columbia University og KTH. Hann er meðstofnandi MINDMAKERS.ORG, sem eru alþjóðleg samtök þeirra sem vinna að þróun á sviði gagnvirkrar gervigreindar. Rannsóknir hans nú beinast að gerð stórra gervigreindarkerfa sem búa yfir hæfileikum til skynjunar, aðgerða og rökleiðslu, og notkun þeirra í vélmennum. Nánari upplýsingar er að finna á heimasíðu Kristins (http://www.ru.is/faculty/thorisson) og heimasíðu Gervigreindarseturs, CADIA (http://ailab.ru.is).