Þriðji fyrirlestur Tungutækniseturs á þessum vetri verður haldinn í stofu 201 í Háskólanum í Reykjavík við Ofanleiti þriðjudaginn 8. janúar og hefst kl. 12:00. Fyrirlesturinn nefnist "Vefþulan - Laganemar, lesblindir, léttar fréttir, lygimál og klám" en í honum fjallar Helga Waage um Vefþuluna (http://www.hexia.net/upplestur), það sem fólki hefur dottið í hug að nota hana í, misgagnleg notkunartilvik, þróun tölvuraddarinnar Röggu og viðskiptahugmyndina á bak við þetta allt saman.

Helga Waage útskrifaðist með BS gráðu í tölvunarfræði frá Háskóla Íslands árið 1989. Hún lauk meistaraprófi í tölvunarfræði frá University of Pittsburgh árið 1993. Hún er stofnandi og annar aðaleigandi hexia.net – en hexia.net er hugbúnaðarhús sem hannar hugbúnað sem miðlar efni af ýmsu tagi milli tölva og farsíma. Hexia.net var tilnefnt eitt af 200 framsæknustu fyrirtækjum í heiminum af Red Herring árið 2005. Helga var verkefnastjóri í tungutækniverkefnunum Ragga - gerð íslensks talgervils  og Hjal - gerð íslensks talgreinis. Hún hefur einnig setið í ýmsum ráðum og stjórnum og sinnt ýmsum trúnaðarstörfum fyrir einkaaðila, opinbera aðila og háskólastofnanir.