Stofnanir og samtök á sviði tungutækni

Forsætisráðuneytið
sér um stefnumörkun ríkisstjórnarinnar í málefnum upplýsingasamfélagsins og á því sviði starfar sérstök verkefnisstjórn sem heyrir undir ráðuneytið.

Háskóli Íslands
Við Háskólann eru stundaðar rannsóknir á ýmsum sviðum sem tengjast tungutækni, s.s. íslenskri málfræði, tölvunarfræði og rafmagns- og tölvuverkfræði. Kennsla í tungutækni til MA-prófs hófst innan íslenskuskorar haustið 2002.

Háskólinn í Reykjavík
Við Háskólann í Reykjavík eru stundaðar rannsóknir á ýmsum sviðum tungutækni, og einnig rannsóknir í gervigreind. Þar eru einnig kennd námskeið á sviði tungutækni.

Landsbókasafn Íslands - Háskólabókasafn
vinnur að því að koma margvíslegum textum á rafrænt form og gera þá þannig nýtilega í tungutækniverkefnum. Margir þessara texta eru aðgengilegir á Timarit.is. Safnið vinnur einnig að söfnun og varðveislu íslenskra vefsíðna.

Menntamálaráðuneytið
Rannsóknir og kennsla í tungutækni heyrir undir ráðuneytið. Það stóð fyrir gerð skýrslu um íslenska tungutækni árið 1999 og setti í kjölfar hennar á fót sérstaka verkefnisstjórn í tungutækni.

Skýrslutæknifélag Íslands
er félag þeirra sem starfa við eða hafa áhuga á upplýsingatækni. Félagið stendur fyrir ráðstefnu- og fundahaldi og gefur út tímaritið Tölvumál þar sem stundum birtast greinar um tungutækni. Á vegum félagsins starfar orðanefnd á sviði tölvu- og upplýsingatækni og hefur hún gefið út Tölvuorðasafn sem er aðgengilegt á netinu.

Staðlaráð Íslands
er vettvangur hagsmunaaðila til að vinna að stöðlun og notkun staðla á Íslandi. Nokkrir staðlar varða tungumál og tungutækni, t.d. ÍST 130 Upplýsingatækni - íslenskrar kröfur.

Stofnun Árna Magnússonar í íslenskum fræðum
vinnur m.a. að stafrænni skráningu íslenskra miðaldatexta og á hlut að samstarfi um safn norrænna miðaldatexta. Orðfræðisvið hefur yfir að ráða umfangsmiklum stafrænum texta- og gagnasöfnum um íslenskt mál, þ.á m. Ritmálsskrá, orðasafni með notkunardæmum úr íslenskum ritum allt frá 1540. Sviðið hefur einnig gert íslenska beygingarlýsingu, þróað vélræna málfræðimörkun íslensku, og vinnur nú að gerð markaðrar íslenskrar málheildar. Málræktarsvið starfar m.a. að íðorðamálum og starfrækir Orðabanka með íðorðum úr ýmsum starfs- og fræðigreinum.

Þýðingamiðstöð utanríkisráðuneytisins
hefur það hlutverk að þýða EES-samninginn, gerðir sem heyra undir hann, og aðra texta sem tengjast aðild Íslands að Evrópska efnahagssvæðinu. Þýðingamiðstöðin hefur komið upp hugtakasafni sem hægt er að leita í á netinu.